NAIBU WAZIRI WA MAMBO YA NDANI YA NCHI alijibu:-

Mheshimiwa Spika, kwa niaba ya Waziri wa Mambo ya Ndani ya Nchi, ninapenda kujibu swali la Mheshimiwa Abubakar Mohammed Mussa, Mbunge wa Jimbo la Mtoni, kama ifuatavyo:-

Mheshimiwa Spika, uzalishaji wa Vitambulisho vya Taifa nchini hufanyika katika Kituo Kikuu cha Uchakataji wa Taarifa (Data Centre-DC) ambapo taarifa zote za usajili na utambuzi wa watu wote waliosajiliwa huchakatwa kwa ajili ya kuzalisha Namba ya Utambulisho (NIN) na Vitambulisho. Kituo hicho kina miundombinu mbalimbali ya kuwezesha utambuzi wa mwombaji na ulinganifu wa alama za vidole (Automated Fingerprint Identification System) ambao unamtambua kipekee mwombaji wa Kitambulisho cha Taifa.

Mheshimiwa Spika, uchapishaji wa Vitambulisho vya Taifa hufanyika kwa mfumo wa jumla (Centralized System) ili kuhakikisha usalama, udhibiti madhubuti wa ubora, pamoja na usimamizi thabiti wa taarifa muhimu za wananchi wanaosajiliwa na kutambuliwa. Uchapishaji wa vitambulisho katika kituo kimoja chenye ulinzi na udhibiti husaidia katika ulinzi wa taarifa za kibayometriki, mifumo ya usimbaji (encryption) na vifaa maalum, na hivyo kupunguza hatari ya udanganyifu, uvujaji wa taarifa na au utengenezaji wa vitambulisho bandia (fraud), uwezekano wa kutofautiana kwa ubora wa vitambulisho, pamoja na ongezeko la gharama za uendeshaji kutokana na hitaji la mitambo na rasilimali watu katika maeneo yatakayoanzishwa vituo. Ninaomba kuwasilisha, ahsante.