MHE. SALEHE M. MHANDO aliuliza: -
Je, lini Serikali itapeleka fedha za awamu ya pili kwa ajili ya kukamilisha ujenzi wa Vituo vya Afya vya Vuju, Mswaki na Negero katika Jimbo la Kilindi?
NAIBU WAZIRI, OFISI YA WAZIRI MKUU, TAWALA ZA MIKOA NA SERIKALI ZA MITAA (MHE. DKT. JAFAR R. SEIF) alijibu: -
Mheshimiwa Spika, ahsante sana. Kwa niaba ya Waziri wa Nchi, Ofisi ya Waziri Mkuu-TAMISEMI naomba kujibu swali la Mheshimiwa Salehe Mbwana Mhando, Mbunge wa Jimbo la Kilindi, kama ifuatavyo: -
Mheshimiwa Spika, Serikali imeendelea kutoa fedha kwa ajili ya ujenzi wa vituo vya vya katika kata za kimkakati kote nchini. Katika kipindi cha miaka mitano Serikali imejenga jumla ya vituo vya afya 487 vikiwemo Vituo vya Afya vya Vuju, Mswaki na Negero katika Halmashauri ya Wilaya ya Kilindi.
Mheshimiwa Spika, Serikali imefanya tathmini na kuainisha jumla ya vituo vya afya 364 vyenye upungufu wa miundombinu muhimu. Aidha, vituo 111 vimetengewa bajeti ya shilingi bilioni 23.37 katika mwaka 2026/2027 kwa ajili ya ukamilishaji ikiwemo Halmashauri ya Wilaya ya Kilindi ambayo imetengewa shilingi milioni 200 kukamilisha Vituo vya Afya Vuju na Mswaki. Aidha, Kituo cha Afya Negero ni kati ya Vituo vya Afya 120 vya kimkakati vilivyopokea shilingi milioni 250 kupitia bejeti ya nyongeza ya mwaka wa fedha 2024/2025. Ujenzi umehusisha jengo la kuhudumia wagonjwa wa nje (OPD), choo cha nje na kichomea taka na ujenzi upo hatua ya ukamilishaji.
Mheshimiwa Spika, Serikali itaendelea kutenga fedha kwa awamu na kukamilisha ujenzi wa miundombinu ya vituo vya afya ili viweze kutoa huduma muhimu ikiwemo huduma za upasuaji wa dharura kwa akinamama wajawazito.
Mheshimiwa Spika, naomba kuwasilisha.
MHE. SALEHE M. MHANDO aliuliza: -
Je, Serikali ina mpango gani wa kujenga madaraja yaliyoharibika katika maeneo mbalimbali ya Jimbo la Kilindi ili kurahisisha usafiri?
NAIBU WAZIRI, OFISI YA WAZIRI MKUU, TAWALA ZA MIKOA NA SERIKALI ZA MITAA (MHE. DKT. FESTO J. DUGANGE) alijibu: -
Mheshimiwa Mwenyekiti, kwa niaba ya Waziri wa Nchi, Ofisi ya Waziri Mkuu, TAMISEMI, ninaomba kujibu swali la Mheshimiwa Salehe Mbwana Mhando, Mbunge wa Jimbo la Kilindi, kama ifuatavyo:-
Mheshimiwa Mwenyekiti, Wilaya ya Kilindi ina mtandao wa barabara wenye urefu wa kilometa 871.59 unaohudumiwa na TARURA. Aidha, ina jumla ya vivuko 1,066 ambapo madaraja makubwa ni matatu, box kalvati 592, Solid drift 466, vented drift tano. Daraja moja linafanya kazi na yaliyoharibika mawili.
Mheshimiwa Mwenyekiti, Serikali imeendelea kufanya usanifu na kujenga madaraja ambapo mwaka wa fedha 2024/2025 Serikali ilitenga kiasi cha shilingi milioni 500 kwa ajili ya ujenzi wa Daraja la Mgera lenye upana wa meta 20 kwa awamu ya kwanza na ujenzi umefikia 60%.
Mheshimiwa Mwenyekiti, aidha, kwa mwaka wa fedha 2025/2026 Serikali imetenga kiasi cha shilingi milioni 500 kwa ajili ya kukamilisha ujenzi wa Daraja hilo la Mgera. Aidha, Serikali imeshakamilisha usanifu wa Daraja la Negero lenye upana wa meta 80 ambapo ujenzi wake unakadiriwa kugharimu kiasi cha shilingi bilioni 4.72.
Mheshimiwa Mwenyekiti, aidha, Serikali inaendelea na ukarabati wa madaraja yaliyochakaa katika Wilaya ya Kilindi ambapo katika mwaka wa fedha 2023/2024 ilikarabati Daraja la Ngeze, Barabara ya Kwekivu - Ngeze kwa gharama ya shilingi milioni 7.8 na kujenga box kalvati jipya Barabara ya Mapanga - Mlingotini kwa gharama ya shilingi milioni 24.14.
Mheshimiwa Mwenyekiti, Serikali itaendelea kutenga bajeti ili kuendelea na ujenzi wa madaraja mapya na kukarabati madaraja yaliyochakaa kote nchini ikiwemo Jimbo la Kilindi.