NAIBU WAZIRI WA MALIASILI NA UTALII alijibu: -

Mheshimiwa Mwenyekiti, kwa niaba ya Waziri wa Maliasili na Utalii, ninaomba kujibu swali la Mheshimiwa Mary, Mbunge wa Serengeti kama ifuatavyo:-

Mheshimiwa Mwenyekiti, Serikali imekuwa ikilipa kifuta jasho na kifuta machozi kama mkono wa pole au faraja kwa wananchi wanaopata madhara kutokana na wanyamapori wakali na waharibifu, kwa lengo la kuimarisha mtazamo chanya kwa wananchi juu ya shughuli za uhifadhi wa rasilimali za wanyamapori nchini. Malipo hayo yamekuwa yakifanyika kwa mujibu wa Kanuni za Kifuta Jasho na Kifuta Machozi za Mwaka 2011 na marekebisho yake ya mwaka 2024.

Mheshimiwa Mwenyekiti, katika kuboresha utaratibu wa kushughulikia masuala ya wanyamapori wakali na waharibifu, Serikali imeanza kutumia mfumo wa kielektroniki wa PAIS (Problem Animal Information System), ambao utawezesha kurahisisha ukusanyaji na uwasilishaji wa taarifa za matukio ya wanyamapori wakali na waharibifu kwa wakati, kuongeza kasi ya uchakataji na uhakiki wa taarifa zinazowasilishwa, kuwezesha malipo ya kifuta jasho na kifuta machozi kufanyika kwa wakati, na kupunguza udanganyifu wa taarifa zinazowasilishwa.

NAIBU WAZIRI, OFISI YA WAZIRI MKUU, TAWALA ZA MIKOA NA SERIKALI ZA MITAA (MHE. DKT. FESTO J. DUGANGE) alijibu: -

Mheshimiwa Mwenyekiti, kwa niaba ya Waziri wa Nchi, Ofisi ya Waziri Mkuu, TAMISEMI, ninaomba kujibu swali la Mheshimiwa Mary Daniel Surati, Mbunge wa Jimbo la Serengeti, kama ifuatavyo: -

Mheshimiwa Mwenyekiti, kwa mujibu wa Sheria ya Fedha za Serikali za Mitaa, Sura 290 kifungu cha (6), (7), (8) na (9) vimebainisha vyanzo vya mapato vya Mamlaka za Serikali za Mitaa. Ushuru wa huduma ni miongoni mwa vyanzo vya mapato vilivyoainishwa katika Sheria hiyo kinachotozwa kwa kiwango cha 0.25% ya mauzo.

Mheshimiwa Mwenyekiti, Halmashauri ya Wilaya ya Serengeti imekuwa na changamoto ya kukusanya ushuru huo kwa kuwa Kampuni nyingi za utalii zipo katika Halmashauri ya Jiji la Arusha hivyo kupelekea kampuni hizo kulipa ushuru wa huduma katika halmashauri hiyo licha ya utalii wenyewe kufanyika katika Halmashauri ya Wilaya ya Serengeti.

Mheshimiwa Mwenyekiti, Serikali imetoa maelekezo ya mgawanyo wa ushuru huo kwa uwiano wa 60% kwa Halmashauri ya Wilaya ya Serengeti ambapo shughuli za utalii hufanyika na 40% kwa Halmashauri ya Jiji la Arusha ambapo yapo makao makuu ya kampuni hizo. Hatua hii imepunguza mgongano wa utendaji katika ukusanyaji wa mapato yatokanayo na ushuru huo, pia takwimu za makusanyo zinaonesha kuwa mapato hayo yanaongezeka kila mwaka.

Mheshimiwa Mwenyekiti, hata hivyo, Ofisi ya Waziri Mkuu, TAMISEMI, ipo kwenye hatua za mwisho za kuandaa Kanuni za Usimamizi na Ukusanyaji wa Ushuru wa Huduma. Pamoja na mambo mengine, Kanuni hizo zitaainisha namna bora ya kugawana mapato yatokanayo na ushuru wa huduma kati ya halmashauri moja na nyingine pale inapotokea migongano ya kimapato, ahsante.