NAIBU WAZIRI, OFISI YA WAZIRI MKUU, TAWALA ZA MIKOA NA SERIKALI ZA MITAA (MHE. DKT. FESTO J. DUGANGE) alijibu:-

Mheshimiwa Spika, kwa niaba ya Waziri wa Nchi, Ofisi ya Waziri Mkuu – TAMISEMI, ninaomba kujibu swali la Mheshimiwa Mohamed Mussa Utaly, Mbunge wa Jimbo la Lindi Mijini, kama ifuatavyo:-

Mheshimiwa Spika, kipande cha Barabara ya Mtange – Kineng’ene chenye urefu wa kilometa 5.5 hadi kufika Kituo cha Afya Kineng’ene ni sehemu ya Barabara ya Mtange – Kibaoni yenye urefu wa kilometa 19.3 iliyopo katika Jimbo la Lindi Mjini. Ujenzi wa barabara hii kwa kiwango cha lami umekuwa ukifanyika kwa awamu, ambapo mpaka sasa kipande cha kilometa 2.3 tayari kimejengwa kwa kiwango cha lami kwa awamu tatu tofauti ambazo zimegharimu kiasi cha shilingi bilioni 1.449.

Mheshimiwa Spika, katika mwaka wa fedha 2025/2026, Serikali imetenga shilingi milioni 500 kwa ajili ya ujenzi wa barabara hii kwa urefu wa meta 600 kwa kiwango cha lami. Aidha, katika bajeti ya mwaka wa fedha 2026/2027, Serikali imetenga kiasi cha shilingi milioni 500 kwa ajili ya ujenzi wa mita 600 za kiwango cha lami.

Mheshimiwa Spika, Serikali itaendelea kutenga fedha kwa awamu ili kuendelea na ujenzi wa barabara hii.

NAIBU WAZIRI WA UCHUKUZI alijibu:-

Mheshimiwa Spika, ninaomba kujibu swali la Mheshimiwa Mohamed Mussa Utaly, kwa niaba ya Mheshimiwa Waziri wa Uchukuzi, kama ifuatavyo:-

Mheshimiwa Spika, Serikali inatambua umuhimu wa ujenzi wa kiwanja cha ndege cha Lindi ili kukidhi haja ya uwekezaji wa mradi wa kuchakata gesi kuwa kimiminika (LNG) pamoja na kuchechemua shughuli nyinginezo za kiuchumi na kijamii. Aidha, ujenzi wa kiwanja hicho uliahidiwa na Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania, katika kampeni za uchaguzi wa mwaka 2025. Hivyo, ujenzi wa kiwanja hicho ni kipaumbele cha Wizara yetu na Serikali kwa ujumla.

Mheshimiwa Spika, kwa sasa Serikali kupitia Mamlaka ya Viwanja vya Ndege, tayari imeshaingia mkataba na kampuni ya China Railway Construction Engineering Group kwa ajili ya ukarabati na maboresho ya kiwanja hicho cha ndege cha Lindi utakaochukua muda wa miezi 24. Ukarabati huo utahusisha ujenzi wa barabara ya kuruka na kutua ndege, barabara ya kiungio, maegesho ya ndege pamoja na maegesho ya magari.

Mheshimiwa Spika, utekelezaji wa mradi huo unatarajiwa kuanza mwaka wa fedha 2026/2027. Aidha, Serikali itaendelea kutenga fedha ili kuendeleza kiwanja cha ndege cha Lindi pamoja na viwanja vingine vya ndege vya mikoa kulingana na mpango wa uendelezaji wa viwanja vya ndege nchini Tanzania.

NAIBU WAZIRI WA AFYA alijibu: -

Mheshimiwa Mwenyekiti, kwa niaba ya Mheshimiwa Waziri wa Afya, ninaomba kujibu maswali ya Mheshimiwa Mohamed Mussa Utaly, Mbunge wa Lindi Mjini, kama ifuatavyo:-

Mheshimiwa Mwenyekiti, ujenzi katika Hospitali ya Rufaa ya Mkoa wa Lindi unatekelezwa kwa awamu. Awamu ya kwanza na ya pili zimekamilika kwa gharama ya shilingi 4,000,000,000 ambapo sakafu ya kwanza imekamilika na inatoa huduma. Aidha, Wizara imeingia Mkataba kwa ajili ya ukamilishaji wa awamu ya tatu ambapo Mkandarasi ameanza kazi mwezi Novemba, 2025 kwa Mkataba wa miezi 12 na unatarajiwa kukamilika kabla au ifikapo mwezi Desemba, 2026.

Mheshimiwa Mwenyekiti, mpaka sasa Mkandarasi ameshalipwa kiasi alichoomba jumla ya shilingi 812,000,000 kama hati ya malipo ya awali (Advance Payment). Aidha, Serikali itaendelea kusimamia ujenzi huo ili kuhakikisha unakamilika kama ilivyopangwa. Ninaomba kuwasilisha.

NAIBU WAZIRI WA MALIASILI NA UTALII alijibu:-

Mheshimiwa Mwenyekiti, ahsante. Kwa niaba ya Waziri wa Maliasili na Utalii, ninaomba kujibu swali la Mheshimiwa Mohamed Mussa, kama ifuatavyo:-

Mheshimiwa Mwenyekiti, Wizara inaendelea kusimamia na kutekeleza Sera ya Taifa ya Utalii ya Mwaka 1999, ambayo imetilia mkazo suala la kutanua wigo wa mazao ya utalii nchini kwa kubainisha vivutio na mazao ya utalii, kuyaweka katika mpango wa uendelezaji na utangazaji, ambapo katika mwaka wa fedha 2024/2025 lilifanyika zoezi la kubaini vivutio vya utalii katika mikoa 10 ikiwemo Lindi. Kwa upande wa Mkoa wa Lindi, mazao na vivutio vya utalii vilivyobainishwa ni pamoja na maeneo ya kihistoria, malikale, utamaduni na fukwe za bahari zenye fursa za kukuza utalii kupitia uwekezaji wa huduma na shughuli mbalimbali za utalii.

Mheshimiwa Mwenyekiti, Wizara itaendelea kushirikiana na wadau mbalimbali kutoka sekta za umma na binafsi, ikiwa ni pamoja na mamlaka zilizopo Lindi kuhakikisha vivutio vilivyopo mkoani humo vinaendelezwa. Aidha, Wizara kupitia Bodi ya Utalii Tanzania itaendelea kuimarisha mikakati ya kutangaza na kuvifikisha sokoni vivutio vya Lindi kwa kutumia majukwaa ya kidijitali, mitandao ya kijamii, maonesho ya utalii na kampeni mbalimbali za masoko ndani na nje ya nchi.