Supplementary Questions from Hon. Mohamed Mussa Utaly (6 total)
MHE. MOHAMED M. UTALY: Mheshimiwa Mwenyekiti, ahsante sana kwa kunipa nafasi hii. Kwanza, niwashukuru sana wizara hii kwa kutupatia mnara katika Kata ya Tandangongoro. Tandangongoro sasa inazungumza; je, ni lini Serikali itajenga minara ya mawasiliano katika Jimbo la Lindi, hususan katika maeneo ya Kata ya Chikonji, Kitumbikwela, Mbanja na Rasbura?
NAIBU WAZIRI WA MAWASILIANO NA TEKNOLOJIA YA HABARI: Mheshimiwa Mwenyekiti, ninaomba nijibu swali la nyongeza la Mheshimiwa Mbunge wa Lindi, kama ifuatavyo: -
Mheshimiwa Mwenyekiti, Serikali kupitia Wizara yetu tunatekeleza mpango wa miaka mitano wa kujenga minara katika mikoa na wilaya zote nchini ikiwemo Jimbo la Lindi. Kwa hiyo, nimhakikishie Mheshimiwa Mbunge kwamba katika mpango wetu huu tutafika katika jimbo lake na tutafanya kama anavyoomba kujenga minara ya mawasiliano.
Mheshimiwa Mwenyekiti, nichukue nafasi hii pia kumwelekeza Mkurugenzi Mkuu wa UCSAF kutuma wataalamu katika jimbo hili kufanya tathmini ya uhitaji wa minara katika jimbo lake ili tuingize katika mpango wetu wa miaka mitano wa ujenzi wa minara nchi nzima. Nakushukuru.
MHE. MOHAMED M. UTALY: Mheshimiwa Spika, ninashukuru sana kwa kunipa fursa hii ya kuuliza swali la nyongeza.
Mheshimiwa Spika, barabara hii ikiwemo pamoja na barabara iendayo katika Hospitali ya Rufaa ya Mkoa pamoja na barabara inayopita katika Ofisi ya Mkuu wa Wilaya ya Lindi zilishaidhinishwa kujengwa katika awamu hii ya mwaka 2025/2026 ambapo mwaka huu wa fedha unaishia mwezi Juni.
Mheshimiwa Spika, hata hivyo, mpaka sasa TAMISEMI haijatoa kibali, ili TARURA iweze kusaini mkataba na mkandarasi. Je, ni lini TAMISEMI itatoa kibali ili TARURA iweze kusaini mkataba na mkandarasi? (Makofi)
NAIBU WAZIRI, OFISI YA WAZIRI MKUU, TAWALA ZA MIKOA NA SERIKALI ZA MITAA (MHE. DKT. FESTO J. DUGANGE): Mheshimiwa Spika, ninampongeza sana Mheshimiwa Mohamed Mussa Utaly, Mbunge wa Lindi Mjini kwa kazi nzuri anayoifanya kwa ajili ya wananchi wa Lindi Mjini.
Mheshimiwa Spika, ninaomba nimhakikishie tu Mheshimiwa Mbunge kwamba Serikali kwa nia njema imeweka utaratibu, baada ya kutangaza zabuni na kupata wakandarasi kuna utaratibu wa kutoa kibali baada ya kujiridhisha na uwepo wa fedha ili miradi ikianza na wakandarasi wakiwa site kusiwe na mkwamo wa kukosa fedha.
Mheshimiwa Spika, ninaomba nimhakikishie Mheshimiwa Mbunge, tayari Ofisi ya Waziri Mkuu, TAMISEMI kupitia TARURA imeshapokea maombi ya kupata kibali hicho na sasa wako hatua za mwisho za kutoa kibali hicho ili mkataba huu uanze kutekelezwa kwa ajili ya ujenzi wa barabara hizo. Ahsante sana.
MHE. MOHAMED M. UTALY: Mheshimiwa Spika, ninashukuru kwa majibu ya Serikali, lakini nina maswali mawili ya nyongeza. Kwa kuwa Serikali imeingia mkataba na mkandarasi huyu tarehe 22 Julai, 2024 na sasa yapata miezi 15 bado mkandarasi huyu hajalipwa malipo ya awali jambo ambalo limemfanya ashindwe kuanza kazi, je, ni lini Serikali italipa malipo ya awali kwa mkandarasi huyu ili aweze kutekeleza wajibu wake katika kujenga kiwanja hiki?
Mheshimiwa Spika, swali la pili. Kwa kuwa Serikali tayari imesaini mkataba wa miezi 24 wa utekelezaji wa ujenzi wa kiwanja hiki, je, Mheshimiwa Naibu Waziri anaweza kulieleza Bunge hili kwamba ni kiasi gani cha fedha kimetengwa katika bajeti ya mwaka huu 2026/2027 kwa ajili ya utekelezaji wa ujenzi wa kiwanja hiki cha ndege cha Lindi? Ahsante sana.
NAIBU WAZIRI WA UCHUKUZI: Mheshimiwa Spika, ninampongeza Mheshimiwa Mohamed Utaly kwa kufuatilia Uwanja wa Ndege wa Lindi ambao ni muhimu sana na una historia kubwa kwa nchi yetu.
Mheshimiwa Spika, Serikali kwa kulitambua hilo, ilishafanya hatua mbalimbali sambamba na kumtafuta mkandarasi, kama ambavyo nimezungumza kwenye jibu la msingi, uwanja huu unajengwa kwa zaidi ya shilingi bilioni 120. Kwa hiyo, unaweza kuona jinsi ambavyo Serikali imebeba kwa uzito mkubwa sana uwanja huu wa Lindi.
Mheshimiwa Spika, maswali yake mawili yameuliza, lini na kiasi gani kimetengwa? Kutokana na umuhimu wake katika mwaka huu wa fedha, na bajeti iliyopitishwa hapa, Mheshimiwa Waziri baada ya kupokea maelekezo ya viongozi wakuu, tunafanya maboresho ndani ya bajeti yetu.
Mheshimiwa Spika, awali tulitenga shilingi 3,800,000,000 lakini tayari tunatafuta fedha nyingine karibu shilingi 70,000,000,000 ambazo zitakwenda kwenye maeneo manne. Moja, kwa ajili ya kulipa fedha za malipo ya awali kwa ajili ya uwanja wa ndege wa Mwanza uanze kujengwa kama ambavyo tulisikia wote mjadala unavyoendelea, na pili, ni kwa ajili ya kuhakikisha uwanja wa ndege wa Mtwara ambao tulishapata mkandarasi, na alikuwa hajalipwa fedha za malipo ya awali.
Mheshimiwa Spika, tatu, kuhakikisha uwanja wa ndege wa Lindi ambao tulishapata mkandarasi na hakulipwa fedha za awali na yeye aanze kulipwa mwaka wa fedha unaoanza uanze kujengwa. Nne, kuendeleza kasi ya maandalizi ya ujenzi wa uwanja wa ndege wa Njombe.
Mheshimiwa Spika, hivyo, ninamsihi Mheshimiwa Utaly atupe nafasi, tukishaanza utekelezaji, kazi hii inakwenda kuanza kama ilivyoahidiwa kwenye kampeni na Rais wetu mpendwa Mheshimiwa Dkt. Samia Suluhu Hassan.
MHE. MOHAMED M. UTALY: Mheshimiwa Mwenyekiti,
ninashukuru sana kwa kunipatia nafasi ya kuuliza swali la nyongeza.
Mheshimiwa Mwenyekiti, katika Jimbo la Lindi ipo barabara ambayo inajengwa kupitia Mradi wa TACTIC, lakini mkandarasi ameshapewa mkataba, lakini anasuasua mpaka sasa katika suala la ujenzi wa barabara hii na Mheshimiwa Mkuu wa Mkoa amekutana na mkandarasi huyu lakini bado anaonekana hatakelezi majukumu yake ipasavyo.
Je, Mheshimiwa Naibu Waziri, upo tayari kuambatana nami sako kwa bato kwenda kuonana na kuzungumza naye ili aweze kurekebisha mwenendo wake na barabara hii ijengwe kwa manufaa ya wananchi wa Lindi? (Makofi)
NAIBU WAZIRI, OFISI YA WAZIRI MKUU, TAWALA ZA MIKOA NA SERIKALI ZA MITAA (MHE. DKT. FESTO J. DUGANGE): Mheshimiwa Mwenyekiti, ni kweli kwamba Manispaa ya Lindi ni moja ya halmashauri ambazo zina Miradi ya TACTIC na ikiwemo ujenzi wa barabara za lami na ni kweli kama alivyosema Mheshimiwa Utaly, Mbunge wa Jimbo la Lindi Mjini kwamba tulishapata
mkandarasi na amekuwa site.
Mheshimiwa Mwenyekiti, ninaomba nipokee hoja kwamba, mradi huo hauendi kwa kasi inayotakiwa na nimhakikishie Mheshimiwa Mbunge kwanza, leo tutawasiliana na Meneja wa TARURA wa Mkoa wa Lindi ili watupe taarifa rasmi kwa nini mkandarasi huyo hafanyi kazi kwa kasi inayotakiwa na ikiwa kuna
vifungu vya kimkataba ambavyo vimekiukwa tutachukua hatua kwa mujibu wa sheria.
Mheshimiwa Mwenyekiti, pia, nitumie nafasi hii nimhakikishie Mheshimiwa Mbunge kwamba dhamira ya Serikali ni kuhakikisha kwamba barabara zetu zote za Mradi wa TACTIC zinakamilika na barabara hiyo itakamilika.
MHE. MOHAMED M. UTALY: Mheshimiwa Mwenyekiti, ninashukuru sana kwa kunipa nafasi. Kwanza ninaipongeza Serikali kwa namna ambavyo inashughulikia suala hili la Hospitali ya Rufaa ya Lindi. Hata hivyo, ninayo maswali mawili ya nyongeza. Kwa kuwa hospitali hiyo inatarajiwa kukamilika mwezi Disemba mwaka 2026, tuliokuwa nao, je, Serikali imejipangaje kuhakikisha kuwa mambo muhimu kama vifaatiba, mashine za kisasa, wataalamu bobezi wa afya wanapatikana mara tu ujenzi utakapokamilika? (Makofi)
Mheshimiwa Mwenyekiti, swali la pili. Kwa kuwa Mkoa wa Lindi ni miongoni mwa mikoa inayokua kwa kasi kutokana na Uchumi wa Bluu na mradi wa Mkakati wa Gesi, je, Serikali imezingatia ukubwa wa hospitali hiyo kuendana na ongezeko la watu na mahitaji ya huduma za afya za baadaye? (Makofi)
NAIBU WAZIRI WA AFYA: Mheshimiwa Mwenyekiti, kwanza ninampongeza Mheshimiwa Mbunge Mohamed Utaly kwa kazi nzuri anayofanya kuwapigania wananchi wa Lindi. Kama nilivyosema, kwenye swali langu la msingi, Hospitali ya Lindi ni hospitali mpya ambayo imeanza kufanya kazi mwezi wa 12 kwa kuhama kwenye majengo ya zamani kwenda kwenye majengo mapya. Sisi kama Serikali tumejipanga kuhakikisha kwamba hospitali hii itakapoisha inakuwa na vifaa kamili.
Mheshimiwa Mwenyekiti, mpaka sasa hospitali hii inavyo vifaa muhimu vya kufanya uchunguzi wa radiolojia kwa maana ya ultra sound machine, X-Ray machine, na CT-Scan na vyote hivyo vinafanya kazi. Hospitali hii inayo maabara ya kisasa yenye uwezo wa kupima vipimo vyote vikubwa kwa maana ya kibingwa. Inayo bio-chemistry machine, Cell Dyn pamoja na Haematology Analyzer.
Mheshimiwa Mwenyekiti, Hospitali hii ya Lindi inatoa huduma za kibingwa katika fani tatu, lakini inayo wataalamu watano. Serikali imejipanga kupeleka watumishi sita kwenda kusoma ili tuweze kupata wataalamu wa kibingwa zaidi.
Mheshimiwa Mwenyekiti, hivyo ninamhakikishia Mheshimiwa Mbunge kwamba tumejipanga Hospitali ya Lindi kutoa fani za kutosha. Lengo letu ni kwamba ifikiapo 2030, Hospitali hii ya Lindi iweze kutoa fani za kibingwa 17 kama ambavyo Rais, Mheshimiwa Dkt. Samia Suluhu Hassan, alielekeza alipohutubia Bunge mwezi wa 11 mwaka 2025 kwamba tunatakiwa kufika katika huduma hizo za kibingwa 17. Kwa hatua za haraka, tutafanya msawazo wa wataalamu wa kibingwa ili waweze kufika Lindi kuendelea kutoa huduma.
Mheshimiwa Mwenyekiti, swali la pili linataka kujua tumejipanga vipi? Lindi inakua, Lindi ni mkoa wa kimkakati, na Serikali imejipanga kuendana na ukubwa wa mkoa huo. Ndiyo maana tumeihamisha kutoka hospitaki kongwe ambayo ilikuwa na eneo dogo na majengo chakavu, na tumeipeleka kwenye eneo jipya ambalo lina ekari 100. Hivyo, ninakuthibitishia Hospitali ile ya Lindi tunaweza kuipanua kwa kadiri tunavyotaka kwa sababu tayari eneo linatosha kuweza kutoa huduma hizo tarajiwa. Ninaomba kuwasilisha.
MHE. MOHAMED M. UTALY: Mheshimiwa Mwenyekiti, ninamshukuru sana Naibu Waziri kwa majibu mazuri na ninaipongeza Serikali kwa kazi kubwa iliyoifanya ya kubainisha mazao ya utalii katika Mji wa Lindi. Maswali yangu ya nyongeza mawili ni haya yafuatayo:-
Mheshimiwa Mwenyekiti, je, Mheshimiwa Naibu Waziri haoni kuwa, kwa kitendo cha kubainisha vivutio hivyo vya utalii tangu mwaka wa fedha 2024/2025 na mwaka wa fedha uliofuata 2025/2026, kutofanyika chochote katika uendelezaji wa vivutio hivyo ni kuwanyima Vijana wa Lindi fursa ya ajira na kuikosesha Serikali mapato, ambayo yangeweza kupatikana kutokana na utalii katika vivutio hivyo? (Makofi)
Mheshimiwa Mwenyekiti, swali la pili, je, katika mwaka huu wa fedha 2026/2027 ni vivutio vipi hasa vya utalii, katika Manispaa ya Lindi, vipo katika mpango huu wa kuendelezwa? (Makofi)
NAIBU WAZIRI WA MALIASILI NA UTALII: Mheshimiwa Mwenyekiti, ninaomba kujibu maswali mawili ya nyongeza ya Mheshimiwa Mohamed Mussa, lakini kabla ya kujibu ninaomba nimpongeze sana kwa maswali yake mazuri yenye kujenga. Ninaomba uniruhusu nianze kujibu swali la pili.
Mheshimiwa Mwenyekiti, vivutio ambavyo vimebainishwa kule Mkoani Lindi ni pamoja na fukwe za Lindi Mjini, Kilwa, pamoja na sehemu za kihistoria. Maeneo ya kihistoria ya Vita vya Majimaji, kama kule Nandete pamoja na Tendaguru.
Mheshimiwa Mwenyekiti, kuhusu swali lake la pili. Serikali imefanya jitihada mbalimbali baada ya kubaini vivutio hivyo, ikiwa ni pamoja na kuviweka kwenye mpango wa mwaka huu 2026/2027. Aidha, Wizara itaendelea kushirikiana na mamlaka mbalimbali za Serikali za Mitaa, Ofisi ya Mkuu wa Mkoa kule Lindi, pamoja na wadau wengine, ili kuendeleza vivutio hivyo kwa pamoja. Ahsante sana.