NAIBU WAZIRI WA UJENZI: Mheshimiwa Mwenyekiti, ninakubaliana na Mheshimiwa Mbunge, barabara hii ambayo ni ya kipande cha kutoka Handeni – Kibirashi – Kibaya kwenda kwa Mtoro kilometa 50 Kibaya – Kisima, tunachosubiri tu sasa hivi ni kumpa mkandarasi malipo ya awali ili aweze kukijenga kipande hicho cha kilometa 50.
Mheshimiwa Mwenyekiti, Mkandarasi yupo tayari, tumeshapeleka maombi yetu Hazina ili aweze kulipwa malipo ya awali aanze kazi, ahsante.

NAIBU WAZIRI WA UJENZI: Mheshimiwa Spika, barabara hii tunategemea kupatikana kwa fedha. Tayari sisi tumeshaomba fedha za awali ili mkandarasi aweze kulipwa, na akishalipwa, basi kazi hiyo ya kuanza kuzijenga hizo kilometa 50 itaanza.

NAIBU WAZIRI WA MAJI: Mheshimiwa Mwenyekiti, kwanza nimpongeze sana Mheshimiwa Olelekaita, na hakika tunapokuwa katika ziara jimboni kwake anatupatia ushirikiano mzuri sana, na pia tunapohitaji taarifa za maendeleo ya miradi yetu ndani ya jimbo lake anatupatia.

Mheshimiwa Mwenyekiti, pamoja na hivyo, nipo tayari kwa niaba ya Mheshimiwa Waziri wa Maji kwenda kutembelea mradi huu na kuupa push ili uweze kukamilika na wananchi wake wa Kiteto wapate huduma ya majisafi na salama, ahsante sana.

NAIBU WAZIRI WA KATIBA NA SHERIA: Mheshimiwa Spika, ninampongeza Mheshimiwa Olelekaita Edward ambaye amekuwa akifanya ufuatiliaji wa mambo mengi sana katika sekta hii muhimu ya sheria.

Mheshimiwa Spika, kuhusiana na swali lake kuhusu ujenzi wa Mahakama hii ya Wilaya ya Kiteto, kama nilivyotangulia kusema, kwa wakati huu Mahakama inatekeleza mpango wa ujenzi na ukarabati wa miundombinu ya Mahakama ikiwemo Mahakama za Wilaya. Mahakama hii ya Wilaya ya Kiteto ipo katika mpango huu wa pili na tayari tenda ilishatangazwa kwa ajili ya kumpata mkandarasi kwa ajili ya ujenzi wa Mahakama hii.

Mheshimiwa Spika, kwa wakati huu bado majadiliano yanaendelea kwa ajili ya kusaini mkataba ili sasa ujenzi wa Mahakama ya kisasa kabisa uweze kuanza na wananchi wa Mheshimiwa Mbunge wapate majengo mazuri kwa ajili ya huduma za Kimahakama.

NAIBU WAZIRI WA HABARI, UTAMADUNI, SANAA NA MICHEZO: Mheshimiwa Mwenyekiti, nishukuru kwa zuri la nyongeza la Mheshimiwa Olelekaita, Mbunge wa Kiteto na nimpongeze kwa kazi kubwa anayoifanya kuwapigania Wanakiteto. Hili la kuambatana naye kwenda Kiteto wala siyo suala la mjadala, atakapokuwa tayari Mheshimiwa Mbunge anifahamishe tujadiliane kuhusiana na ratiba ya Bunge na shughuli nyingine za Serikali, tufunge safari kwa ajili ya kwenda Kiteto.

NAIBU WAZIRI WA MAJI: Mheshimiwa Naibu Spika, kama ambavyo nimejibu katika majibu mengine kuhusiana na vijiji katika vijiji 12,318 nchi nzima, tunavyo vijiji 1,575 tu vilivyobaki. Hivi vijiji 1,575 tunaweka programu maalum ya utekelezaji kwa miaka mitano.

Mheshimiwa Naibu Spika, nawahakikishia Waheshimiwa Wabunge, hivi vijiji 1,575 tumevigawa kwa awamu na kila awamu itagusa kila jimbo na kila mkoa kuhakikisha kwamba, tunaendelea kutekeleza awamu kwa awamu, lakini kila jimbo linakuwa linaguswa kila awamu, ambayo tunakuwa tunaitekeleza.

Mheshimiwa Naibu Spika, kwa hiyo, ninamtoa hofu Mheshimiwa Mbunge, vijiji hivyo 12 tutavigawa kwa awamu, kama viko 12, basi tutaviweka viwili vitatu kila awamu, mwaka wa fedha, tunapokamilisha tunaingia awamu nyingine. Tuna uhakika itakapofika mwaka 2030 vijiji vyote 1,575 kuweka total ya 12,318 vitakuwa vimekamilika.

NAIBU WAZIRI WA NISHATI: Mheshimiwa Mwenyekiti, Ninakushukuru. Pia ninampongeza Mheshimiwa Edward Olelekaita kwa kupambania wananchi wake wa Kiteto. Bahati nzuri Kijiji hicho anachokisema tulishawahi kwenda tukala nyama ya mbuzi pale.

Mheshimiwa Mwenyekiti, Watanzania wa Kiteto wanatudai Wizara ya Nishati kuhakikisha miundombinu yote ya Serikali inayojengwa, siyo tu kisima, hata shule, vituo vya afya na zahanati vinapelekewa nishati ya umeme ili kuongeza tija na kufungamanisha miradi ya Serikali ili iweze kuleta manufaa kwa wananchi.

Mheshimiwa Mwenyekiti, kwenye eneo hili la maji niwaelekeze watu wa REA walioko katika kijiji hiki kuhakikisha wanafikiwa na miundombinu ya umeme ili kisima hiki kiwanufaishe Wanakiteto.

WAZIRI WA NCHI, OFISI YA RAIS, MAENDELEO YA VIJANA: Mheshimiwa Mwenyekiti, ninashukuru kwa swali la Mheshimiwa Olelekaita na ninamuahidi kwamba Kiteto nitafika ipo kwenye ratiba ya kuwafikia vijana huko.

Mheshimiwa Mwenyekiti, mikopo hii kama nilivyoeleza awali huwa tunafanya tathmini maeneo ambayo yamepata na maeneo ambayo hayajapata, hasa yale ambayo yako pembezoni. Kwa sababu inatolewa pia kupitia Wizara za Kisekta, tumeweka utaratibu maalumu wa vipaumbele vya kisekta katika maeneo tofauti tofauti kama vile ufugaji, uvuvi na biashara za kawaida kwa kulingana na eneo husika.

Mheshimiwa Mwenyekiti, kama tulivyosema hii ni awamu ya kwanza, ninamhakikishia Mheshimiwa Mbunge kwamba awamu zinazofuata pia zitagusa katika eneo lako kulingana na sekta za kipaumbele ambapo ninafahamu kule kwako suala la mifugo ni suala la msingi pia na tutalizingatia.

Mheshimiwa Mwenyekiti, ninaomba kuwasilisha. (Makofi)

NAIBU WAZIRI, OFISI YA WAZIRI MKUU, TAWALA ZA MIKOA NA SERIKALI ZA MITAA (MHE. DKT. FESTO J. DUGANGE): Mheshimiwa Mwenyekiti, Mji wa Kibaya ni miongoni mwa miji mikongwe sana katika nchi yetu na katika Jimbo la Kiteto kwa Mheshimiwa Edward Olelekaita na ni mara kadhaa Mheshimiwa Mbunge
amefuatilia kuhusiana na uboreshaji wa soko hilo. Mimi
nimhakikishie tu Mheshimiwa Mbunge kwamba Serikali inatambua umuhimu wa kuboresha Soko la Kibaya. (Makofi)

Mheshimiwa Mwenyekiti, na nitumie nafasi hii kwa niaba ya Waziri wa Nchi, Ofisi ya Waziri Mkuu, TAMISEMI nimwelekeze Mkurugenzi wa Halmashauri ya Kiteto waandae andiko la kimkakati kutokana na umuhimu wa Soko la Kibaya wawasilishe Ofisi ya Waziri Mkuu - TAMISEMI ili tuweze kufanya taratibu kwa awamu kuona uwezekano wa kuboresha soko hilo. (Makofi)

WAZIRI WA NCHI, OFISI YA WAZIRI MKUU, TAWALA ZA MIKOA NA SERIKALI ZA MITAA: Mheshimiwa Naibu Spika, ninampongeza sana Kaka yangu, Mheshimiwa Olelekaita kwa namna anavyowasemea wananchi wa Jimbo lake.

Mheshimiwa Naibu Spika, ninaomba baada ya kikao hiki leo nikae na Kaka yangu, Mheshimiwa Mbunge, tuweze kuona wapi tumefikia na kama vituo vile vipo kwenye orodha ya vile vituo 94 na kama havipo kwenye orodha tuone namna ambavyo tutalishughulikia jambo hili ili wananchi waweze kupata huduma. Ahsante. (Makofi)