NAIBU WAZIRI WA KILIMO alijibu:-

Mheshimiwa Naibu Spika, Serikali inatambua changamoto ya kutokukamilika kwa wakati kwa baadhi ya miradi ya maendeleo ikiwemo mradi wa umwagiliaji wa Delta ya Mto Luiche. Mradi wa Luiche wenye jumla ya thamani ya shilingi bilioni 65.16 unajumuisha ujenzi wa bwawa na miundombinu ya mashambani.

Mheshimiwa Naibu Spika, Serikali kupitia Tume ya Taifa ya Umwagiliaji, mwaka 2025 ilifanya mapitio ya usanifu wa mradi husika ili kuendana na mahitaji ya sasa na hivyo kuongeza muda wa utekelezaji wa mradi hadi mwaka 2027. Baada ya mapitio hayo, mradi umeanza utekelezaji wake.

Mheshimiwa Naibu Spika, kukamilika kwa mradi wa Delta ya Mto Luiche kutanufaisha eneo la umwagiliaji lenye ukubwa wa hekta 3,000 na kunufaisha wakulima zaidi ya 9,620 katika Vijiji vya Kagera, Matiazo, Mungonya, Kamala, Kasuku na Simbo.

NAIBU WAZIRI, OFISI YA WAZIRI MKUU, TAWALA ZA MIKOA NA SERIKALI ZA MITAA (MHE. DKT. FESTO J. DUGANGE) alijibu:-

Mheshimiwa Mwenyekiti, kwa niaba ya Waziri wa Nchi, Ofisi ya Waziri Mkuu, Tawala za Mikoa na Serikali za Mitaa, ninaomba kujibu swali la Mheshimiwa Clayton Revocatus Chipando, Mbunge wa Kigoma Mjini, kama ifuatavyo:-

Mheshimiwa Mwenyekiti, Halmashauri ya Manispaa ya Kigoma Ujiji hadi mwaka wa fedha 2020/2021 ilikuwa inapokea Bajeti ya Matengenezo ya barabara na madaraja jumla ya shilingi bilioni 1.6 kwa mwaka. Kuanzia mwaka wa fedha 2021/2022 mpaka 2025/2026, bajeti iliongezeka hadi kufikia shilingi bilioni 3.2 kwa mwaka.

Mheshimiwa Mwenyekiti, aidha, Serikali kwa kushirikiana na Wadau wa Maendeleo wa Benki ya Dunia kupitia Mradi wa TACTIC Awamu ya Kwanza inatekeleza Mradi wa Ujenzi wa Barabara za kilometa 9.4, Mitaro Mikubwa ya Maji ya Mvua kilometa 5.4, Soko kuu la Mwanga pamoja na Soko la Samaki la Katonga katika Manispaa ya Kigoma Ujiji. Utekelezaji wa mradi huu utaongeza mtandao wa Barabara za lami Kigoma Mjini.

Mheshimiwa Mwenyekiti, Serikali itaendelea kuujengea uwezo wa kibajeti wa Wakala wa Barabara za Vijijini na Mijini ili uweze kutekeleza Ujenzi wa Barabara za tabaka la lami kwa awamu kote nchini ikiwemo katika Manispaa ya Kigoma.

NAIBU WAZIRI, OFISI YA WAZIRI MKUU, TAWALA ZA MIKOA NA
SERIKALI ZA MITAA (MHE. DKT. FESTO J. DUGANGE) alijibu: -

Mheshimiwa Mwenyekiti, kwa niaba ya Waziri wa Nchi, Ofisi ya Waziri Mkuu, TAMISEMI, ninaomba kujibu swali la mheshimiwa Clayton Revocatus Chipando, Mbunge wa Jimbo la Kigoma Mjini kama ifuatavyo: -

Mheshimiwa Mwenyekiti, Serikali imekuwa ikijenga shule mpya za sekondari nchini na kuongeza miundombinu katika shule zilizopo ili kuendana na ongezeko la wanafunzi.

Mheshimiwa Mwenyekiti, katika mwaka wa fedha 2021/2022 – 2025/2026, Serikali imetoa shilingi billioni 5.6 kwa ajili ya ujenzi wa shule mpya nne za sekondari za Businde Mpya, Mjimwema Hill, Kimpampa na Burega, madarasa 152, maabara 24 na kiwanja kimoja cha michezo mbalimbali katika Shule ya Sekondari Kigoma.

Mheshimiwa Mwenyekiti, aidha, mpango wa Serikali wa ujenzi wa shule za wasichana ilikuwa shule moja kwa kila mkoa ambapo shilingi bilioni 4.35 zilitolewa kwa ajili ya ujenzi wa Shule ya Wasichana Kigoma ambayo ilijengwa katika Halmashauri ya Uvinza, Mkoani wa Kigoma.

Mheshimiwa Mwenyekiti, katika mwaka wa fedha 2026/2027, Serikali imetenga shilingi milioni 240 kwa ajili ya ujenzi wa madarasa 10 katika shule tano za sekondari Kigoma Ujiji, Rusimbi, Burega, Bushabani na Businde za Jimbo la Kigoma Mjini. Serikali itaendelea kujenga shule mpya na kuongeza miundombinu katika shule za sekondari nchini ikiwemo katika Jimbo la Kigoma
Mjini. Ahsante.