NAIBU WAZIRI WA MAJI alijibu:-

Mheshimiwa Mwenyekiti, ninaomba kujibu swali la Mheshimiwa Dkt. Wilson Mahera Charles, Mbunge wa Jimbo la Butiama, kama ifuatavyo:-

Mheshimiwa Mwenyekiti, Serikali imekamilisha ujenzi wa Mradi mkubwa wa Maji ya Ziwa Victoria wa Mugango – Kiabakari - Butiama uliogharimu zaidi ya shilingi bilioni 70 na unanufaisha wananchi kwenye Kata za Wilaya za Butiama na baadhi ya maeneo ya Wilaya za Bunda pamoja na Musoma Vijijini.

Mheshimiwa Mwenyekiti, kwa sasa mradi huo umeanza kutoa huduma kwenye vijiji 22 vinavyopatikana kwenye kata saba za Wilaya za Butiama na Musoma Vijijini. Aidha, kazi ya upanuzi wa mradi huo inaendelea kwa awamu kadiri fedha zinavyopatikana ili kuweza kufikisha huduma ya majisafi na salama kwenye maeneo ambayo hayajafikiwa na huduma hiyo ikiwemo baadhi ya vijiji vya Kata za Bisumwa, Bukabwa, Nyankanga, Butuguri, Bwiregi, Buruma, Kyanyari, Buhemba, Mirwa pamoja na Kikirango.

NAIBU WAZIRI, OFISI YA WAZIRI MKUU, TAWALA ZA MIKOA NA SERIKALI ZA MITAA (MHE. DKT. JAFAR R. SEIF) alijibu: -

Mheshimiwa Spika, kwa niaba ya Waziri wa Nchi, Ofisi ya Waziri Mkuu, TAMISEMI, naomba kumjibu Mheshimiwa Dkt. Wilson Mahera, Mbunge wa Jimbo la Butiama:-

Mheshimiwa Spika, Hospitali ya Butiama ni moja kati ya hospitali 25 ambazo zimejengwa katika awamu ya tatu ya ujenzi wa hospitali za halmashauri ambao ujenzi ulianza mwaka 2021/2022. Jumla ya majengo tisa yamejengwa katika Hospitali ya Halmashauri ya Butiama kwa gharama ya shilingi bilioni 3.02.

Mheshimiwa Spika, majengo yaliyokamilika ni pamoja na jengo la OPD, maabara, EMD, jengo jumuishi la uzazi, yaani martenity complex. Aidha, jengo la OPD limekamilika na huduma za wagonjwa wa nje zimeanza kutolewa mwezi Novemba, 2024.

Mheshimiwa Spika, katika mwaka wa fedha 2026/2027 hospitali ya Halmashauri ya Wilaya ya Butiama imetengewa shilingi milioni 500, kwa ajili ya ukamilishaji wa majengo yaliyosalia. Serikali itaendelea kutenga bajeti kwa awamu, kwa ajili ya ujenzi wa miundombinu muhimu katika hospitali za Halmashauri Wilaya ya Butiama.

Mheshimiwa Spika, ninaomba kuwasilisha.

NAIBU WAZIRI, OFISI YA WAZIRI MKUU, TAWALA ZA MIKOA NA SERIKALI ZA MITAA (MHE. DKT. FESTO J. DUGANGE) alijibu: -

Mheshimiwa Mwenyekiti, kwa niaba ya Waziri wa Nchi, Ofisi ya Waziri Mkuu, TAMISEMI, ninaomba kujibu swali la Mheshimiwa Dkt. Wilson Mahera Charles, Mbunge wa Jimbo la Butiama, kama ifuatavyo: -

Mheshimiwa Mwenyekiti, Wilaya aya Butiama ina mtandao wa barabara wa kilometa 596.62 unaohudumiwa na Wakala wa Barabara Vijijini na Mjini. Serikali imekuwa ikitenga bajeti ya matengenezo, ukarabati na ujenzi wa barabara mbalimbali ambapo bajeti ya Wilaya imeendelea kuongezeka mwaka hadi mwaka.

Mheshimiwa Mwenyekiti, katika mwaka wa fedha 2025/2026 Wilaya ya Butiama limeidhinishiwa jumla ya shilingi bilioni 2.59 kwa ajili ya matengenezo na ukarabati wa barabara maeneo korofi yenye urefu wa Kilometa 145.32 na ujenzi wa madaraja 14 pamoja na makalavati 26. Kazi hizi baadhi yake zinaendelea kutekelezwa maeneo mbalimbali ya Jimbo la Butiama ambapo kiasi cha shilingi 722,649,050 kimepelekwa.

Mheshimiwa Mwenyekiti, katika mwaka wa fedha 2026/2027 Serikali imetenga kiasi cha shilingi bilioni 2.74 kwa ajili ya Wilaya ya Butiama kwa ajili ya matengenezo na ukarabati wa barabara maeneo korofi yenye urefu wa Kilometa 155.42 na ujenzi wa madaraja 17 na makalavati 29.

Mheshimiwa Mwenyekiti, Serikali itaendelea kutenga fedha kwa ajili ya utekelezaji wa ujenzi na ukarabati wa barabara za wilaya ya Butiama ili kuwawezesha wananchi kuendelea na shughuli za kiuchumi, ahsante.