MHE. DKT. CHARLES J. SUNGURA aliuliza: -
Je, lini Serikali itajenga Barabara ya Kwedikwazu - Sindeni inayopitia Daraja la Komdudu ambayo ipo kwenye Mradi wa World Bank kwa kiwango cha Lami?
NAIBU WAZIRI, OFISI YA WAZIRI MKUU, TAWALA ZA MIKOA NA SERIKALI ZA MITAA (MHE. DKT. FESTO J. DUGANGE) alijibu: -
Mheshimiwa Naibu Spika, kwa niaba ya Waziri wa Nchi, Ofisi ya Waziri Mkuu, TAMISEMI, ninaomba kujibu swali la Mheshimiwa Charles Jacob Sungura, Mbunge wa Jimbo la Handeni, kama ifuatavyo: -
Mheshimiwa Naibu Spika, Wilaya ya Handeni ni miongoni mwa wilaya zilizo kwenye mpango wa ujenzi wa barabara kwa kiwango cha lami kupitia Programu ya Mradi wa Uibuaji na ufunguaji wa fursa za kijamii na kiuchumi (RISE) inayofadhiliwa na Benki ya Dunia.
MheshimiwaNaibu Spika, Kupitia program hii, barabara ya Sindeni – Kwedikwazu yenye urefu wa kilometa 38 itajengwa kwa kiwango cha lami ikijumuisha ujenzi wa Daraja la Komdudu. Zabuni kwa ajili ya kumpata mkandarasi mjenzi imeshakamilika na mkataba wa ujenzi umesainiwa tarehe 24 Aprili, 2026.
MHE. DKT. CHARLES J. SUNGURA aliuliza:-
Je, lini Serikali itajenga viwanda vya kuchakata nyama na maziwa katika Jimbo la Handeni kwa kuwa lina wafugaji wengi wa ng’ombe, mbuzi na kondoo?
NAIBU WAZIRI WA VIWANDA NA BIASHARA alijibu:-
Mheshimiwa Spika, kwa niaba ya Mheshimiwa Waziri wa Viwanda na Biashara, ninaomba sasa kujibu swali Na. 403 kama lilivyoulizwa na Mheshimiwa Charles Jacob Sungura Mbunge wa Handeni kama ifuatavyo:-
Mheshimiwa Spika, katika Jimbo la Handeni Mjini, kuna Kiwanda kimoja kidogo cha kuchakata na kusindika maziwa kiitwacho Bin Maweni Fully Milk Processing. Kwa sasa Serikali imeshatenga maeneo kwa ajili ya ujenzi wa viwanda vingine vya kuchakata mazao ya mifugo. Maeneo hayo ni Kwamagome, Ngugwini na Mabanda. Serikali inaendelea na juhudi za kutafuta wawekezaji mahiri kwa ajili ya ujenzi wa viwanda vya kuchakata mazao ya mifugo ikiwemo nyama na maziwa. Ninaomba kuwasilisha.