MHE. DKT. CHARLES J. SUNGURA: Mheshimiwa Mwenyekiti, ahsante sana kwa kuniona.
Mheshimiwa Mwenyekiti, ninataka nipate majibu kwa Naibu Waziri kwamba, ni lini Serikali itakamilisha ujenzi wa kituo cha kukusanyia maziwa kilichopo katika Kijiji cha Msomela, Kata ya Misima?
NAIBU WAZIRI WA MIFUGO NA UVUVI: Mheshimiwa Mwenyekiti ninakushukuru sana. Kadri ya upatikanaji wa fedha ndivyo ambavyo Serikali itaendelea na ujenzi wa kituo hiki cha ukusanyaji wa maziwa kilichopo Msomela. Nakushukuru sana.
MHE. DKT. CHARLES J. SUNGURA: Mheshimiwa Naibu Spika, ninashukuru kwa majibu mazuri. Kwa kuwa barabara ya Michungwani - Kwadoya yenye urefu wa kilometa 19 nayo ni sehemu ya utekelezaji wa barabara za awamu ya pili (second road generation) na zabuni barabara hii ishatangazwa, je, ni lini sasa Serikali itatoa barua ya tuzo (letter of award) ili ujenzi wa barabara hii nao uanze kwa kiwango cha lami?
Mheshimiwa Naibu Spika, swali lingine la pili. Kwa kuwa barabara ya Mkata kwa Sunga yenye kilometa 21 nayo ni miongoni mwa utekelezaji wa barabara za third generation road wa RISE, sasa ni lini Serikali itatangaza zabuni ili ujenzi wa barabara hii nao uanze kwa kiwango cha lami? Ahsante sana.
NAIBU WAZIRI, OFISI YA WAZIRI MKUU, TAWALA ZA MIKOA NA SERIKALI ZA MITAA (MHE. DKT. FESTO J. DUGANGE): Mheshimiwa Naibu Spika, ninaomba nimthibitishie Mheshimiwa Sungura, Mbunge wa Handeni, kwamba Serikali inatambua muhimu wa barabara hizo na ndiyo maana tayari tumeanza na hii barabara, na tayari zabuni imeshasainiwa, mkataba ushasainiwa tayari kwa kuanza ujenzi.
Mheshimiwa Naibu Spika, pia tunafahamu na hizo barabara nyingine mbili, moja ambayo Mheshimiwa Mbunge angependa ifanyiwe matangazo na mzabuni apatikane. Nimhakikishie tu kwamba suala hilo tumelichukua, tutalifanyia kazi kwa barabara zote mbili ili tuweze kutangaza zabuni kwa kadri fedha zitakavyopatikana kwa ajili ya kuanza ujenzi wa barabara hizo.
MHE. DKT. CHARLES J. SUNGURA: Mheshimiwa Spika, ninaomba niulize maswali mawili ya nyongeza. Kwa kuwa Kiwanda cha Maziwa cha Tanga Fresh ambacho kilikuwa mkombozi mkubwa kwa wananchi wa Handeni pamoja na mkoa wa ujumla, lakini sasa hivi uzalishaji umesimama. Je, Serikali ina mpango gani sasa kuhakikisha kwamba kiwanda hicho kinarejea katika uzalishaji ili kiwe mkombozi kwa ajili ya wananchi wa Handeni na Mkoa wa Tanga kwa ujumla? (Makofi)
Mheshimiwa Spika, swali la pili, kwa kuwa maeneo ya Segera Kabuku na Kwamgwe katika Jimbo la Handeni yanasifika sana kwa kilimo cha machungwa. Ninaomba kauli ya Serikali, ni lini sasa itajenga kiwanda cha kuchakata machungwa katika maeneo haya kwa sababu 50% ya machungwa yanayolimwa katika maeneo haya yanakuwa yakioza shambani kwa kukosa soko, na pia kwa kukosa viwanda vya kusindika machungwa hayo? Ninashukuru sana. (Makofi)
NAIBU WAZIRI WA VIWANDA NA BIASHARA: Mheshimiwa Spika, kwanza, nikiri kwamba Mkoa wa Tanga ni moja ya mikoa ambayo imebarikiwa sana kwa mazao ya mifugo. Kuhusiana na Kiwanda cha Tanga Fresh, ninaomba nikiri kwamba ni kweli kuna changamoto za kiuendeshaji wa kiwanda hicho. Kiwanda hiki kina uwezo wa kuzalisha maziwa lita 120,000 kwa siku na ndiyo soko kuu na la uhakika kwa ajili ya bidhaa za maziwa kutoka Tanga na mikoa ya jirani.
Mheshimiwa Spika, hivi sasa Serikali, kupitia Wizara ya Mifugo na Uvuvi, Chama cha Ushirika wa Wazalishaji Maziwa Mkoa wa Tanga (TDCU), Hazina na Wizara ya Kilimo, wako kwenye mchakato wa kuona namna bora ya kufufua shughuli za kiwanda hiki na kuimarisha uzalishaji wa maziwa.
Mheshimiwa Spika, Serikali, kupitia Mrajis wa Vyama vya Ushirika, Tume ya Maendeleo ya Ushirika, ameunda timu ambayo inaandaa ripoti na Jumatatu itaiwasilisha ripoti hiyo ili kuona namna bora ya kuimarisha shughuli za uzalishaji na kuzindua ama kuhamasisha shughuli za uzalishaji. Hata hivyo, tunahamasisha sekta binafsi kuendelea kujitokeza kuongeza idadi ya viwanda kwa ajili ya kuongeza thamani ya maziwa.
Mheshimiwa Spika, kuhusiana na suala la matunda, ni kweli, tathmini imefanywa miongoni mwa mazao ya uhakika mkoani Tanga ama maeneo ya kimkakati ambayo tunaweza tukaweka viwanda pamoja na kuongeza thamani ya bidhaa za nyama na maziwa katika mkoa huo, na pia, bidhaa za matunda katika Wilaya ya Korogwe na Muheza. Hivyo, hamasa inaendelea kwa sekta binafsi kushirikiana na Serikali katika uwekezaji wa kimkakati katika mkoa huu, hasa katika maeneo ya kuongezea thamani mazao ya matunda. Ninaomba kuwasilisha.