MHE. KASSIM HASSAN HAJI: Mheshimiwa Spika, awali ya yote na mimi nipende kumshukuru Mwenyezi Mungu kwa wingi wa rehema na kutujalia kuwa wazima wa afya njema na kutuwezesha sote kuwa pamoja siku ya leo. (Makofi)

Mheshimiwa Spika, pili nikushukuru wewe kwa kuweza kunipa nafasi ya kusimama katika Bunge lako tukufu kwa mara ya kwanza, pia nikishukuru chama changu Chama cha Mapinduzi kwa kuweza kunipa nafasi ya kuweza kuwakilisha wa Jimbo la Mwanakerekwe, naishukuru familia yangu pamoja na wananchi wa Jimbo la Mwanakerekwe kwa mashirikiano makubwa wanayonipa na nina wahaidi nitawatumikia Watanzania wote pamoja na wao kwa kuleta maendeleo mapana ya nchi yetu. (Makofi)

Mheshimiwa Spika, hotuba ya Mheshimiwa Rais ukitizama ukurasa wa 13 ameweka kipaumbele kikubwa katika miaka mitano kuendeleza, kulinda na kudumisha tunu za Taifa letu yaani amani, umoja na mshikamano wa nchi yetu, uhuru wa nchi yetu, pamoja na Muungano na Mapinduzi matukufu ya Zanzibar. Pia kuhahidi mashirikiano na Rais wa Zanzibar Dkt. Hussein Mwinyi, na kusisitiza kuwa hata kuwa na mzaa kwa yeyote atakayetaka kukatisha uhuru wetu Muungano wetu na Mapinduzi matukufu ya Zanzibar, hali ambayo imefanya mpaka sasa hivi kuunda kwa Serikali ya Umoja wa Kitaifa katika Kisiwa chetu cha Zanzibar na kuleta maendeleo ya uchumi katika Kisiwa cha Zanzibar.

Mheshimiwa Spika, ukurasa wa 14 wa hotuba hii Mheshimiwa Rais ameonesha kuonesha mashirikiano makubwa ya Serikali ya Mapinduzi ya Zanzibar na kuendelea kuleta maendeleo ya pande zote mbili za Muungano na kuahidi kuleta meli nne katika Kisiwa cha Unguja. Hii imekwenda kufanya kugawanya usawa, usawa wa meli nne ziwepo katika Tazania Bara na meli nne zije katika Kisiwa cha Unguja inakwenda kutimiza lengo la sera ya uchumi wa blue.

Mheshimiwa Spika, pia utoawaji tumeona juzi tu utoaji wa hati, utiahaji saini wa hati wa yamakubaliano ya maridhiano katika ujenzi wa bandari kuu ambayo itajengwa na mji wa kisasa katika Kijiji cha Manga Pwani kule Zanzibar.

Mheshimiwa Spika, mwisho kabisa katika hotuba yake na mimi nimalizie katika ukurasa 36 niipongeze Serikali kwa kutunga sheria mpya kusimamia na kuendeleza uvuvi wa bahari kuu; hii imekwenda kutuongezea ajira zilizo rasmi na zisizo rasmi kwa vijana wetu ambao watakuwa wanajishughulisha na shughuli hizi na kufanya kwenda kuongeza Pato la Taifa letu la Tanzania, na mimi niunge mkono hoja na kumshukuru Mheshimiwa Rais kwa mashirikiano yake makubwa ambayo ameyaonesha katika kisiwa chetu cha Zanzibar na kufanya mikataba ambayo inakwenda ili iwe haki, uhuru na sisi kufanya Kisiwa cha Zanzibar kiwe kiwe kinamabadiliko makubwa katika miaka mitano inayokuja. (Makofi)

Mheshimiwa Spika, nikushukuru sana. (Makofi)

MHE. KASSIM HASSAN HAJI: Mheshimiwa Spika, ahsante sana. Awali ya yote, nimshukuru Mwenyezi Mungu kwa kutujalia uhai na uzima na kutuweka katika Mfungo wa Ramadhan tukiwa wazima na leo kushiriki katika Bunge lako hili Tukufu.

Mheshimiwa Spika, kwenye Ilani ya CCM, ukifungua kifungu cha 226 na 227 na ukurasa wa 276 – 277 inazungumzia mambo ambayo si ya Muungano lakini yanaleta faida katika kutatua changamoto za watu wetu zikishirikiana Serikali zetu mbili; yaani Serikali ya Muungano wa Tanzania (SMT) na Serikali ya Mapinduzi ya Zanzibar (SMZ). Kwanza, niipongeze Wizara kwa kutatua baadhi ya changamoto kwa kuunganisha makampuni BRELA na BPRA. Memorandum ambayo wamefanya angalau inasaidia wafanyabiashara wakubwa wenye makampuni; mtu akiwa amesajili biashara yake Zanzibar, basi angalu wakija huku wanakubalika vile vibali vyao nao vinaweza kufanya kazi, niwapongeze kwa hilo. (Makofi)

Mheshimiwa Spika, vilevile, tukiangalia kwenye ZFDA na TBS wamefanya vivyo hivyo kwa kuwasaidia wafanyabiashara wadogo wadogo. Mtu akichukua biashara yake Zanzibar akija nayo Bara, basi nayo inakwenda bila usumbufu na cheti chao kinakubaliwa na jambo hilo linakuwa jema kwa wafanyabishara wetu wadogo wadogo. Niwapongeze kwa hayo. (Makofi)

Mheshimiwa Spika, lakini kidogo kuna shida moja, jambo hili tunaomba liende likafanyike katika TBS na ZBS. Tukizungumzia ISO kwenye standard katika Jamhuri ya Muungano wa Tanzania tukienda kwenye codex inayotambulika ni moja tu; inatambulika TBS. Kwa hiyo, ZBS wanashindwa ku-recognize zile ISO ambazo wao wenyewe wanatakiwa waende wakazifanye kama ambazo wanazifanya TBS.

Mheshimiwa Spika, kwa mfano, kitu kimesajiliwa Zanzibar; TBS inatakiwa iwasaidie ZBS angalau kitu kile kikitoka nje ya Tanzania basi na wao kiende kikatambuliwe kiufasaha. Kwa hiyo, watu wetu ambao wanafanya biashara ndogo ndogo Zanzibar wanakosa fursa ya kupeleka bidhaa zao nje kwa sababu tu ya haya mambo madogo ambayo yapo na yanaweza kutatuliwa kwa kufanya memorandum ambazo wenzetu wa ZFDA na TBS walifanya lakini walifanya hao wa BRELA na BPRA. (Makofi)

Mheshimiwa Spika, kama kauli yetu ya Muungano ya safari hii inavyosema, “Muungano wetu ni msingi imara katika mapinduzi ya kiuchumi” basi twende tukawasidie wafanyabiashara hao wadogo wadogo na wao waweze angalau kulipata soko la nje ya Tanzania kwa kuweza kufanya biashara zao zikawa zinakwenda na wakiwa wanapata kipato cha mtu mmoja mmoja. Si haya tu na taasisi nyingine ambazo zinakwenda kufanya mambo kama haya ya ushirikiano, basi tuwaombe sana wazifanye hizi memorandum angalau kuwafanya watu hawa wote wawili waweze kufanya biashara sehemu yoyote ambayo itakuwa ipo bila matatizo yoyote. Ahsante sana. (Makofi)

MHE. KASSIM HASSAN HAJI: Mheshimiwa Mwenyekiti, ahsante sana kwa kunipa nafasi. Nami nianze kwa kumshukuru Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan kwa maono yake. Nimshukuru Mheshimiwa Waziri kwa kazi kubwa ya utekelezaji wa maono ya Mheshimiwa Rais, ambayo mimi ninasema sasa hivi washafikia 100%, kwa kwenda kuijenga ile Muhimbili mpya. Tayari 100% zimekamilika. (Makofi)

Mheshimiwa Mwenyekiti, nami nianze tu kwa kuipongeza Serikali, ilikuwa ina dhamira nzuri, njema, yenye tija katika Taifa letu ya kuondoa chakula kukipeleka TBS. Bado tunaona kuna shida nyingine ambayo sasa hivi imejitokeza. Watu ambao wanafanya biashara ya chakula, udhibiti wao umekuwa mdogo, yaani udhibiti wao umekuwa hafifu.

Mheshimiwa Mwenyekiti, ninaomba sana, na tunaiomba Serikali, hii dhamana ya kudhibiti chakula irudi tena kwa TMDA. Taasisi hii ilipata ithibati kubwa sana, na uaminifu duniani kote, kwa sababu tu ya udhibiti mzuri ambao tulikuwa tunaenda nao Tanzania. Sasa hivi tunaomba tena warejeshewe majukumu haya, waendelee nayo wao, ili tuendelee kuwa na hadhi ile ile kama dunia ilivyo. (Makofi)

Mheshimiwa Mwenyekiti, nchi zote zina FDA, kwa maana ya kwamba, wao ndio wadhibiti wa chakula na dawa. Naomba sana Serikali yetu sikivu hii, irejeshe mambo haya katika TMDA.

Mheshimiwa Mwenyekiti, sasa biashara ya supplement imehamia kwenye mitandao. Ukifungua mtandao wa Mheshimiwa Waziri hapo, dawa zote, supplement zote zinauzwa kwenye mitandao. Mbali ya hilo, tayari wale ambao wanauza, wao wanajiita madaktari. Dozi zinatolewa kwenye mitandao, supplement hizo zinauzwa kwenye mitandao.

Mheshimiwa Mwenyekiti, tuna vijana wazuri tu sasa hivi, sasa hawa wanaouza hizi supplement kwenye mitandao, na wao waweze kwenda kuchangia huu Mfuko wa Bima ya Afya. Tuna vijana wazuri ambao wametengeneza njia nzuri za makusanyo, basi nao walisaidie Taifa hili katika kupeleka fedha hizo, makusanyo hayo kusaidia wenzetu ambao watakuwa wanaenda katika kuisaidia Bima ya Afya. (Makofi)

Mheshimiwa Mwenyekiti, niendelee na jambo lingine. Tuna hospitali nyingi sana ambazo tayari tumeshatengeneza, bado tunahitaji marekebisho na vifaa. Katika bajeti hii, ninamwomba sana Waziri aende akasaidie hospitali hizi. Wenzetu Wabunge hapa wamesimama wakasema, wakatoa na mifano katika maeneo yao. Bajeti hii iende ikatatue changamoto hizo, tukiamini kwamba Waziri ni mtu kazi, atakwenda kuboresha hospitali hizi, walau zifikie malengo ambayo Wabunge hawa na wananchi wale wanatarajia kufikia. (Makofi)

Mheshimiwa Mwenyekiti, sasa nimalizie suala langu dogo tu kuhusu DMO, na RMO, wengi wao ni wanaume. Mheshimiwa Waziri, akikaa na Wizara ya TAMISEMI, waende wakaongeze idadi ya wanawake kuwa ma-DMO na ma-RMO. Tunataka kuondoa vifo vya mama wajawazito na watoto. Tukiwawekea hawa ma-RMO na ma-DMO ambao watakwenda kuongeza nguvu katika kinga ya mama na mtoto, basi tutakwenda kufikia malengo kabisa ya kuondoa vifo kabisa, kuwe hakuna. Tukatimize hili, idadi yao tumeitazama, ni ndogo. (Makofi)

Mheshimiwa Mwenyekiti, katika hospitali hizo hizo, tuna hospitali ambazo Mheshimiwa Waziri amesema makusanyo yao yako chini. Tuna hawa ma-DMO, ma-RMO ambao wamekaa katika wilaya katika mikoa, kwa kipindi kikubwa. Tayari chochoro zote za wizi, chochoro zote za kuingiza vitu ambavyo havihitajiki, wameshazizoea. Waende wakafanye mabadiliko, watu ambao tayari wamekaa kwa miaka miwili, miaka mitano, miaka 10 katika maeneo hayo hayo.

Mheshimiwa Mwenyekiti, hata Mheshimiwa Waziri amezunguka katika Wizara nyingi, ndani ya miaka mitano, siyo chini ya Wizara tatu. Basi nao wafanyiwe mabadiliko, kuona angalau tunaenda kuleta tija, lakini angalau tunaweza kwenda kukusanya maduhuli ambayo yatakuwa yanasaidia Wizara katika makusanyo.

Mheshimiwa Mwenyekiti, kwa kumalizia, ninaiomba sana Serikali, tuna ujenzi mkubwa ambao unakwenda kuijenga Muhimbili mpya. Muhimbili mpya ndiyo taswira ya afya katika Taifa letu. Wizara iongeze nguvu, Waziri amesema baada ya miaka mitano, kama kuna uwezekano, Mheshimiwa Rais amesema anataka kuacha furaha kwa Watanzania hawa.

Mheshimiwa Mwenyekiti, ninaomba kama kuna uwezekano, ishuke chini baada ya miaka mitano hata iwe miaka mitatu. Mheshimiwa Rais na yeye atimize majukumu haya, aone furaha hii akiwa bado yupo katika madaraka yake. (Makofi)

Mheshimiwa Mwenyekiti, baada ya kusema hayo, nami ninaunga mkono hoja, ahsante sana. (Makofi)