MHE. GRACE E. MKOMA: Mheshimiwa Mwenyekiti, ahsante kwa kunipa nafasi hii katika Bunge lako Tukufu ili nichangie hotuba ya Mheshimiwa Waziri Mkuu. Kwa kuanza ninaomba nichukue nafasi hii kumshukuru Mwenyezi Mungu kwa kunipa nafasi hii, kwa kunifikisha siku ya leo.

Mheshimiwa Mwenyekiti, ninaomba pia nichukue nafasi hii kumpongeza na kumshukuru sana Mwenyekiti wetu wa Chama Cha Mapinduzi, Rais wetu Mama Samia Suluhu Hassan kwa kura nyingi ambazo alizipata na zimepelekea Chama Cha Mapinduzi kuwa na Wabunge wengi katika Bunge hili Tukufu. (Makofi)

Mheshimiwa Mwenyekiti, ninaomba nichukue nafasi hii kumshukuru sana Mheshimiwa Dkt. Samia Suluhu Hassan kwa kutuona sisi watu wa Singida; kwa maana ya kutuchagulia au kumteua Waziri Mkuu Mheshimiwa Dkt. Mwigulu Nchemba ambaye anatokea Mkoa wa Singida. Tunashukuru sana Mheshimiwa Dkt. Samia Suluhu Hassan kwa kutuamini.

Mheshimiwa Mwenyekiti, ninachukua nafasi hii pia kumpongeza Mheshimiwa Waziri Mkuu kwa kuaminiwa na Mama Samia Suluhu Hassan. Sisi wananchi wa Singida tunampongeza sana. Tunamwombea kwa Mungu aendelee kuchapa kazi, Wanasingida tunamwamini, lakini na Taifa la Tanzania linamwamini; aendelee kuchapa kazi. (Makofi)

Mheshimiwa Mwenyekiti, ninaomba nichukue nafasi hii pia kumshukuru mama yetu mlezi wetu wa UWT, Mama Mary Chatanda. Ametulea vizuri wanawake wa UWT na ametuweka pamoja na wanawake wote tumekuwa na umoja. Ninaomba nichukue nafasi hii kuwashukuru sana wanawake wa Mkoa wa Singida ambao wao sasa walinichagua kwa kura nyingi na wamesababisha mimi kuwepo kwenye Bunge hili Tukufu kwa ajili ya kuwawakilisha. Ninawaahidi kwamba nitawawakilisha vyema na kwa weledi mkubwa. (Makofi)

Mheshimiwa Mwenyekiti, ninaipongeza sana Serikali kwa kazi nyingi ambazo inazifanya, pia kwa kuleta fedha nyingi katika Mkoa wetu wa Singida na kusababisha miradi mingi kutekelezeka; ninaipongeza sana Serikali yetu.

Mheshimiwa Mwenyekiti, pamoja na kuleta fedha nyingi hizo, bado katika Mkoa wetu wa Singida kuna changamoto nyingi sana. Ninaiomba Serikali, kwa mfano kwenye suala la barabara; ninaona kila Mbunge akisimiama hapa analalamikia habari ya barabara. Vilevile, kila Mbunge akisimama hapa analalamikia maji na kila Mbunge akisimama hapa analalamika kuhusu elimu. (Makofi)

Mheshimiwa Mwenyekiti, ninaomba nichukue nafasi hii kutaja changamoto mbalimbali ambazo ziko katika Mkoa wangu wa Singida, hasa nikianza katika barabara. Katika Mkoa wetu wa Singida, hasa katika Wilaya ya Iramba, tuna changamoto kubwa sana ya barabara. Tuna barabara inayoanzia katika Kijiji cha Misigiri. Barabara hiyo inapita Ndago inaenda mpaka Singida Mjini. Barabara hiyo inaunganisha wilaya tatu za Mkoa wetu wa Singida. Barabara hiyo ni muhimu sana. (Makofi)

Mheshimiwa Mwenyekiti, barabara hiyo imeanza kujengwa tangu miaka miwili iliyopita, lakini bado inasuasua; mpaka sasa barabara hiyo haijakamilika. Ninaiomba Serikali itusaidie kuikamilisha barabara hiyo ya Mkoa wa Singida ambayo inaunganisha wilaya tatu; iwasaidie wananchi wa Mkoa wa Singida ili sasa na wao waweze kufaidika na barabara hiyo. (Makofi)

Mheshimiwa Mwenyekiti, katika mikoa yetu iliyoko Tanzania Mkoa wa Singida ni moja ya mikoa kongwe na mikoa ya zamani sana, lakini mpaka hivi sasa ninavyozungumza katika Mkoa wa Singida hatuna chuo kikuu. Ninaiomba Serikali itusaidie kutujengea chuo kikuu katika Mkoa wetu wa Singida; ukizingatia kwamba population ya Mkoa wa Singida sasa inakuwa kubwa, ili sasa na sisi wananchi wa Mkoa wa Singida tuendelee kunufaika na chuo kikuu. (Makofi)

Mheshimiwa Mwenyekiti, kuna changmoto nyingine kubwa sana ambayo inafanya wanawake wa Mkoa wa Singida kukosa amani na hata familia sasa zinakuwa na manung’uniko. Changamoto hiyo ni maji. Katika Wilaya ya Iramba ambalo ndilo jimbo la Mheshimiwa Waziri Mkuu, katika Kitongoji cha Kiomboi tuna changamoto kubwa sana ya maji na wanawake wa wilaya hiyo hasa katika Kitongoji cha Bomani wanateseka sana. Ninaiomba Serikali itusaidie sana kututatulia changamoto hiyo ya maji ambayo imekuwa kero sana kwa wanawake wa Wilaya ya Iramba. (Makofi)

Mheshimiwa Mwenyekiti, kama unavyojua, maji ndiyo uhai, maji ndiyo kila kitu, lakini katika Wilaya ya Iramba tuna changamoto kubwa sana na hiyo imekuwa kero kubwa sana kwa wanawake wa Wilaya ya Iramba. Ninaomba sana sana Serikali itusaidie kutatua changamoto hiyo ili sasa hawa wanawake waondokane na hiyo changamoto ya maji. (Makofi)

Mheshimiwa Mwenyekiti, kwa kumalizia, ninashukuru sana, ninaishukuru Serikali yangu. Ninaamini Serikali yangu ni Serikali sikivu, itaenda kusaidia kero hizi na kutatua kero hizi za watu wa Mkoa wa Singida, ili sasa watu wa Mkoa wa Singida waifurahie Serikali yao. (Makofi)

Mheshimiwa Mwenyekiti, ahsante sana na ninaunga mkono hoja. (Makofi)

MHE. GRACE E. MKOMA: Mheshimiwa Mwenyekiti, ahsante sana kwa kunipa nafasi nami nichangie katika Bajeti hii ya Wizara ya Afya. Kwanza, ninaomba nichukue nafasi hii kumshukuru Mwenyezi Mungu kwa kunipa afya njema nami kusimama mahali hapa.

Mheshimiwa Mwenyekiti, pia ninaomba nichukue nafasi hii kumshukuru au kuwapongeza Waziri wa Wizara ya Afya, lakini Naibu Waziri wa Wizara ya Afya na Katibu Mkuu wa Wizara ya Afya kwa kazi nyingi ambazo wanazifanya katika Wizara hii na tuliona mchango wao mkubwa sana katika Wizara hii wanaoifanya. (Makofi)

Mheshimiwa Mwenyekiti, ninaomba nichukue nafasi hii pia kumpongeza Rais wetu Mheshimiwa Dkt. Samia Suluhu Hassan, hasa kwa fedha nyingi ambazo amezileta katika Mkoa wetu wa Singida, takribani shilingi bilioni 5,140, ili kutekeleza miradi ya Wizara ya Afya katika Mkoa wetu wa Singida. Fedha hizo zimetumika kuboresha miundobinu katika Mkoa wetu wa Singida; kujenga zahanati katika Mkoa wetu wa Singida, ambapo zahanati hizo zilikuwa hazijakamilika.

Mheshimiwa Mwenyekiti, ninaomba nichukue nafasi hii kupongeza sana watumishi wetu wa Mkoa wa Singida ambao baada ya fedha hizi kuletwa, wao walizisimamia na kuhakikisha zahanati na vituo vya afya vikakamilika. (Makofi)

Mheshimiwa Mwenyekiti, pamoja na fedha hizo kuletwa katika Mkoa wetu wa Singida, lakini bado tuna changamoto nyingi sana. Katika Mkoa wetu bado tuna changamoto za watumishi, takribani 58%. Watumishi hao ni madaktari wa usingizi, waganga na manesi.

Mheshimiwa Mwenyekiti, kuna siku nilitembelea zahanati mojawapo katika Mkoa wetu wa Singida, zahanati hiyo ya Bomani, nilikutana na nesi mmoja, anatoa chanjo, lakini pia anawasaidia wanawake wajawazito hasa pale ambapo wanapata uchungu.

Mheshimiwa Mwenyekiti, katika Mkoa wetu wa Singida changamoto ya watumishi ni kubwa sana. Ninaomba Serikali, kupitia Waziri wetu wa Wizara ya Afya, alichukue hili na akajaribu kuitatua changamoto hii hasa kwa Mkoa wetu wa Singida. (Makofi)

Mheshimiwa Mwenyekiti, kwa Mkoa wetu wa Singida bado kuna ukosefu wa magari ya kusambazia chanjo. Mfano, katika Wilaya ya Ikungi bado kuna changamoto kubwa sana, Wilaya hiyo haina kabisa gari la kusambazia chanjo. Pia, Mkalama nako kuna changamoto kubwa sana, hakuna gari kabisa la kusambazia chanjo. Nina imani kubwa sana na Waziri wetu wa Wizara ya Afya, ninaomba alione hili, ili sasa hawa wananchi na wenyewe wakapate gari la kusambazia chanjo, katika Mkoa wetu. (Makofi)

Mheshimiwa Mwenyekiti, katika mkoa wetu wa Singida bado kuna changamoto kubwa sana, na changamoto hiyo bado kuna kata takribani 78, hazijapata vituo vya afya. Ninamwomba sana Mheshimiwa Waziri wetu wa Wizara hii ya Afya, alichukue hili na alione kwa uzito sana. Ukiangalia Mkoa wetu wa Singida na wilaya zake zote, uko scattered sana. Wananchi wa Mkoa wa Singida wanaishi scattered sana, na wanapata changamoto kubwa sana.

Mheshimiwa Mwenyekiti, ninaomba Waziri alichukue hili na aliangalie kwa uzito, sasa na wananchi wa Mkoa wa Singida wakajengewe hospitali ili tuweze kutatua changamoto ya watu wetu. (Makofi)

Mheshimiwa Mwenyekiti, ninapongeza sana Wizara hii kwa kazi nyingi inayoendelea kufanya, lakini kuna ujenzi wa Hospitali ya Muhimbili. Ninaunga mkono hoja kwa huu ujenzi mkubwa wa Hospitali ya Muhimbili, kwa sababu Hospitali hii ya Muhimbili inaenda kulitangaza Taifa la Tanzania kwa upya. Pia inaenda kutatua changamoto nyingi ambayo sasa wananchi wengi walikuwa wanatoka kwenye mikoa yetu ya Tanzania, wanaenda kulundikana katika Hospitali ya Muhimbili. Mlundikano unakuwa ni mkubwa, lakini hospitali hii ikienda kujengwa wananchi wengi wataenda kufaidika na hii hospitali.

Mheshimiwa Mwenyekiti, ninashukuru sana, nami ninaunga mkono hoja. (Makofi)